والمشكله ماهيب في كثر الاصوات
المشكله لاصار ماللعقل صوت
هكذا أنهى الشاعر / محمد جارالله السهلي قصيدة جريئة تمنيت ان لاتنتهي كيف لاتكون جريئة وهو القائل :
إن مت من قول الحقايق سهالات
على الأقل تدري على ويش بتموت
اترككم تستمتعون بتذوق شعره كما استمتعت أنا به :
الفكر ضد الموت في كل الاوقات
واللي بليا فكر عايش بتابوت
الصح منه يدوم ويخلد أموات
والا الغلط مجرد سنين ويموت
والشعر لوصار راعي قناعات
يصبح حكي لكن على هيئة بيوت
والصدق مفتاح الكرامة ومنجاة
يكسيك من لبس الثناء مشلح وكوت
والكذب نقص عقول وفعول واثبات
ان أغلب الياقوت ماهو بياقوت
والحب أحلى شي الا مع الذات
والدار أغلى شي الا بلا قوت
والدين عز وهيمنة وانتصارات
لاصار فعل وقول وإجهاد وقنوت
يوم المشايخ قبل عصر الدويلات
تنقل كفن وسلاح ماتنقل بشوت
في وقتها ياهل الخطب والشعارات
سالت دموع العز من عين جالوت
وفي وقتنا ياصانعين القرارات
نضحي بغزة على شان بيروت
والفرق شاسع ياصراع الحضارات
والقول أكيد وبالادلة ومثبوت
الماضي أمجاد وشموخ وفتوحات
والحاضر مهايط ومقهى وبيلوت
وأمــرّ وأدهى ماهو قادم وآت
لاصار واقعنا مبهذل وممقوت
يمثل الأمة في الامة عصابات
وعلى خراب بيوت تتعمر بيوت
جلسات سرية على شان جلسات
تفوت اللي مستحيل انه يفوت
واللعب واضح في جميع المجالات
( بتشوت صلح لي أصلحك اتشوت )
والخير بــيــّـــن في وجيه البشوات
والشعب مستهلك ومتعب ومكبوت
حرية الراي اختصاص القيادات
وحنا تخصص ذل وانصات وسكوت
ياصاحبي خل القصص والحكايات
وش ميزة التوت ان فقد لذة التوت
إن مت من قول الحقايق سهالات
على الأقل تدري على ويش بتموت
والمشكله ماهيب في كثر الاصوات
المشكله لاصار ماللعقل صوت
الخميس أبريل 17, 2008 3:40 pm
